Nga Redaksia – Avokati Altin Goxhaj, me ironinë që e karakterizon, shprehet se edhe ai, “si agjent i Iranit dhe Kazakistanit, i Sorosit dhe i MOSAD-it”, solidarizohet me deklaratën e Grupit Koordinues të Protestës, duke ironizuar etiketimet dhe akuzat që sipas tij përdoren shpesh ndaj zërave kritikë.
Në emër të Grupit Koordinues të Protestës, pas 22 ditësh dëgjimi të propozimeve të sovranit, është bërë publike një deklaratë politike për të sqaruar protestuesit dhe të gjithë qytetarët shqiptarë, si ata të pranishëm në shesh ashtu edhe ata që e mbështesin protestën me zemër dhe mendje.
Sipas deklaratës, kjo protestë mbarëpopullore dhe paqësore ka pesë kërkesa kryesore.
Kërkesa e parë është dorëheqja e panegociueshme e Kryeministrit dhe e qeverisë.
Kërkesa e dytë parashikon krijimin e një qeverie teknike tranzitore, jopartiake, me mandat 12-mujor.
Pika e tretë ka të bëjë me ndryshime kushtetuese, me synimin që të gjithë shtetasit shqiptarë të jenë të barabartë para ligjit dhe që këto ndryshime të miratohen me referendum popullor. Në këtë kuadër kërkohet ndryshimi i Kodit Zgjedhor, ndryshimi i ligjit për financimin e partive politike dhe organizatave të ndryshme, si dhe kufizimi i ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.
Paralelisht, Grupi Koordinues kërkon anulimin e ndryshimeve të bëra në ligjin për “Zonat e Mbrojtura”, anulimin e ndryshimeve në ligjin për “Trashëgiminë Kulturore”, shfuqizimin e paketës ligjore të njohur si “Paketa e Maleve”, si dhe shfuqizimin e statusit dhe kuadrit ligjor për “Investimet Strategjike”.
Sipas deklaratës, kontrata e re sociale mes qytetarëve dhe shtetit do të përpilohet pas konsultimeve me intelektualë, ekspertë teknikë dhe qytetarë apartiakë, të propozuar nga vetë sheshi i protestës.
Grupi Koordinues thekson se këto janë kërkesa të qarta, legjitime dhe të panegociueshme, të dala nga zëri i qytetarëve dhe nga vullneti i sovranit, duke deklaruar se protesta do të vazhdojë në mënyrë paqësore, demokratike dhe qytetare deri në realizimin e tyre.
Në fund, Altin Goxhaj shton se, sipas tij, mënyra se si u sulmua Dritan Goxhaj, të cilin e cilëson patriot shqiptar që ka luftuar në Kosovë, Maqedoni dhe Preshevë, vërteton tezën se Endri Fuga është rikthyer në detyrë, duke nënkuptuar rikthimin e metodave të vjetra të propagandës dhe sulmeve ndaj figurave të caktuara publike.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.